විප්ලවය? බම්බුව තමයි!

කුමාරයි මමයි හෝල්ට් එක මගඇරලා මුල්ලකට ගියේ තිත තියපු භාණ්ඩයක් එක්ක.

අපි නිහඬවම ඒ ආශ්වාදය වින්දා.

ප්‍රොෆෙෂනල් හිඟන ඇඳුමක් ඇඳගෙන වයසක මනුස්සයෙක් වෙව්ලමින් ආවා...

"අනේ මහත්තයෝ.. තේ එකක් බොන්න කීයක් හරි..."

ඒ මිනිහ අත පෑවා.

මම අහක බලාගත්තා.

කුමාර සාක්කුවෙන් විස්සක් ඇදල අරන් ඒ මිනිහට දුන්නා. මිනිහ කුමාරට වැඳල යන්න ගියා.

"උඹට පිස්සුද බං?" මම ඇහුවා.

"ඇයි?"

"උන්ට ඔහොම කලාම තවත් හිඟන්නු වැඩි වෙනවා."

"ඉතිං?"

"ඉතිං කියන්නේ? අපි හිඟන්නු නැති සමාජයක් හදන්නයි ඕන..."

"බම්බුව තමයි...!!!"

කුමාර කිණ්ඩියට හිනා වුණා.

"උඹගෙ ඔය හිඟන්නු නැති සමාජෙ හැදෙනකල් අර මනුස්සය බඩගින්නෙ ඉන්නද...?"

කුමාර විස්සෙ කොටේ විසි කලා.

"උන්ට ඕන අද දවසෙ ජීවත් වෙන්න"



ලියා එව්වේ - hare :-) (http://living.hartstuff.com/)