පුංචි ගෙඹි පැටව්

උදේ ඉදන් වැටුණු මහ වැස්ස අපේ හමුවට බාධාවක් උනේ නැහැ. කඳුකර පාරේ ඔයාගේ
අතේ එල්ලීගෙන ඇවිදන් යෑම මට හැමදාමත් සුන්දර අත්දැකීමක්. අපි ඇවිදන් ගියේ
කඳු මුදුනේ තියෙන සුන්දර මිටියාවතට.. කහ මල් වලින් වැහුණු කොළපාට තණ
නිල්ලේ වාඩි වෙලා මුමුනන්න.

තවතින්න.. අර... බලන්න..

තෙත් මාවතේ එක් තැනක පේලිය පැනගෙන එක චූටි ගෙඹි පැටව් ටිකක්.

ම‍ට ඊළඟ ආත්මේ මේ වගේ නිදහසේ පැන පැන යන ගෙඹි පැටියෙක් වෙන්න ඔනි..

සෙන්ටිමීටරයක් තරම් පොඩි ඒ පැටව් දිහා බලන් ඉන්න ගමන් ඔයා කීවා..

මාත් එහෙනම් ගෙම්බියෙක් වෙනවා...

අපිව පහුකරන් ගිය මොන්ටේරෝ රිය වංගුවෙන් හැරිලා නොපෙනී යද්දි.. මියගිය
අසරණ ගෙඹි පැටවුන් දිහා බලාගෙන ඔයා ලොකු හුස්මක් ගත්තා.

ලියා එව්වේ - සුදු හංසී (http://kaveej.blogspot.com/)