Friday, November 30, 2012

මල් සීය

වචන සීයක් ලියන්නයි හිතුණේ.
කොළයකුත් පෑනකුත් අතට ගත්තා.
දැන් මං මොනවද ලියන්නේ? හිතමින් මතකෙට මොනවහරි එනකන් කොළේ උඩ හරියෙන් පොඩි රවුමක් ඇන්දා.
රවුම වටේට පෙති දාලා ඒක මලක් කළා.
ඊළඟට ඒකෙ ත්‍රිමාන ලක්ෂණ මතුවෙන්න පාට කළා.
පෙති වල සුමට ගතිය ගන්නයි මං ගොඩක් වෙහෙසුණේ.
තව පොහොට්ටුවකුයි කොළ කීපයකුයි දාලා ඊළඟට ඒක මල් ඉත්තක් කළා.
නැවත නැවතත් මල් කීප තැනකම ඇන්දා.
මුළින් පෙති පහේ මල්. ඊළඟට අටපෙති, දාස්පෙති වගේ මලුත් ඇඳුණා.
පොකුරු මලුත් ඇඳුණා. හැම මලම පාට කළා.
පස්සෙ මං මල් ගණන් කරමින් අඳින්න ගත්තා.
මල් සීයකට ආවම තමයි නැවතුණේ.
ලියන්න මුකුත් හිතුණෙ නෑ කියල හිතෙනකොට කොළේම මල් වලින් පිරිලා තිබුණා.

ලියා එව්වේ - මගේ ජීවිතය

Wednesday, November 28, 2012

ආදරේ සුන්දරයි

හිතට දැනෙන හැම දේම කියන්නම ඕන නෑ. එත් නොකියා ඉන්නත් බෑ නේද? ආදරය කරද්දි බොහොම පුංචි දේවල් හරිම සුන්දරයි. මුලින්ම  කියවල ඉමුකො.


බන්ඩියට බඩගිනියිලු
ඔයාට කව්ද කීවෙ?
බන්ඩිය
පව් නේද?
ඔව් නේද? ඉතින් අපි මොකක්ද කරන්නෙ?
අපි එයාට සල්ලි කීයක් හරි දෙමු මොනවහරි කාල එන්න කියල
බෑලු, එයාට තනියම යන්න බෑලු.
එහෙනම් ඔයා පාඩම් කරන්නකො, මම ගිහින් මොනවහරි අරන් දීල එන්නම්කො
යකෝ ඒක මගෙ බන්ඩියනෙ.
ආආ තොගෙද? එහෙනම් වරෙන් යන්න

මේ මාස ගානක් දිග Study Leave එකක එක දවසක Short Note එකක් ගහපු කොල කෑල්ලක පෙම්වතුන් යුවලක් ලියල තිබුන දෙබසක්.

Try කරල බලන්න. සමහරවිට මේ ක්‍රමය ඔබටත් සොඳුරු අත්දැකීමක් වේවි.

ලියා එව්වේ - මන්දාරම (http://mandharama.blogspot.com/)

Monday, November 26, 2012

කුරුළු පිහාටු

අපි දෙන්නා විතරක් තනි වෙච්චි ගඳ ගහන කාමරේ. මගේ අතේ තිබ්බේ කුරුළු පිහාට්ටක්. අපි දෙන්නා බීච් එකේ ඇවිදං එන ගමන් එයාමයි දැකලා අහුලගත්තේ.

නිරුවත් ඇගේ ලය මැදින් නාභිය දක්වා. ඉහල ඉඳන් පහලට පහල ඉඳන් ඉහලට නැවතත් නාභිය ගාවට, ඊට ටිකක් පහලට.

"නිකා ඉන්න අනේ මට කිති....."
හිනා වෙවී කිව්ව විදිහට මට හිතුනේ තව පහලට කරන්නැයි කිව්වා කියලා.

"කැලෑවක් මැද්දේ හැංගුණු ගල් ගුගාවක් ඇතුලට කුරුළු පිහාට්ටක් හුළඟේ පාවෙලා ආවා මේං මෙහෙම"

"නවත්තන්න අනේ කිති කැවෙනවා ඕකට"

                                                                 ******************************************************************

මම කුරුළු පිහාට්ට ඉඹලා බැලුවා. එයාගේ සුවඳ තාමත් ඉතිරිද කියලා. හපුටු ගඳයි ඔළුව රිද්දන මතකයයි විතරයි. කරුමක්කාර කුරුළු පිහාට්ට! මම දෙකට කඩලා වීසි කළා.

ලියා එව්වේ -

Friday, November 23, 2012

අළුත් කෝණය

උද්ධමනෙත් එක්ක වැඩි වුණ බස් ගාස්තුව දරාගන්න එක රටේ වැඩ කරන ජනතාවට ලොකු ප්‍රශ්ණයක් වුණා.

බදු සහන ලැබිලත් ලැම්බො ගිණි ගණන් නිසා ඒක විසඳුමක් වුණෙත් නෑ.

බස් ගාස්තු අඩු කරන්න කියල වර්ජන කල්ලි සේරම වටරවුමකට එකතු වෙලා බෙරිහන් දුන්නා.

රටේ ලොක්ක, හැම ප්‍රශ්ණයක් දිහාම අළුත් කෝණෙකින් බලන ආර්ථික කටයුතු ඇමතිව වර්ජකයන්ට උත්තර බඳින්න පිටත් කලා.

ආර්ථික ඇමති මේ ප්‍රශ්ණෙත් අළුත් කෝණෙකින් බැලුවා.

''අපි දන්නවා තමුන්නාන්සෙලට තියෙන ලොකුම ප්‍රශ්ණෙ ප්‍රවාහණේ බව. තෙල් මිල වැඩි වෙද්දි ප්‍රවාහන ගාස්තු වැඩි වෙන එක අහන්න දෙයක් නෙවෙයි. මේකට අපි නියම විසඳුම ලබා දෙනවා. ලබන මාසෙ ඉඳන් සතියෙ දවස් හතරක්ම නිවාඩු. දවස් තුනක් වැඩට ගියාම ඇති.''

එව්වේ - hare :-)

Wednesday, November 21, 2012

විඳීම් මනඃකල්පිතයි... සංජයගේ සිහිනය හරවා දුටිමි.

මා රුව මෙලොව සොඳුරුමැයි සිතා අයා සිටින ඔහු දෑස් තුලින් රෝම කූපයක් පාසා ගලා යන රාගය නම් විදුලි ධාරාව පසිඳුරන් පිනන්නට දඟ දමා සැරසෙන සර්පයා අවදි කරවයි.
වියරු සපාකෑම් වලින් දැනීම් නැත්තටම නැතිවූ මගේ දෙතොල් මත වාමාවර්තව පැදකුණු කල ඔහුගේ දබරැගිල්ල...
එක් වරම මා තිසරුන් නහවන්නට ලං කල් ඔහු මුව...
නොදැමුණු තරුණ මදයෙන් මගේ පිට පුරා සක්මන් සොයන ඔහුගේ නැඹුල් අතැඟිලි...
සියක් මුවින් නහවා ඉඳුල් කල තිසරුන්ට කෙසේ දැනෙන්නද ඔබේ ඔය තරුණකම...
සූරා කොනිත්තා දැනීමක් නොදැනෙන  රළු වුණු මගේ පිටට ඔය ඇඟිලි ලාමක වැඩි වීද?
ඔහු මා විඳින්නට තනයි.
මම විඳවමි ඔහු හා තව පැයක්  යලි නොඑන හීනයේ තාවකාලික උම්මත්තිකාව!

ලියා එව්වේ - නිශානි

Monday, November 19, 2012

විඳීම් මනඃකල්පිතයි...

ඇගේ රුව රූප සුන්දරියන් වැඳිරි මෑල්ලන් බවට පත් කිරීමට සමත්ය. ඈ දෙස බලා සිටීම පවා හැඟීම් නැමති නළාවෙන් රාගය නැමැති තනුව වාදනයකර මාගේ සුරතල් සර්පයා රංගනයකටක යොමුකිරීමක් වැන්න.

මම දබරඟිල්ල ඈගේ සියුමැලි දෙතොලේ දාරය වටා වටයක් දක්ෂිණාවර්තව පැදකුනු කෙරෙව්වෙමි. ඒ තිසර යුවල ජලයෙන් නහවන්නට මා පටන් ගතිමි. සෙමින් සෙමින් පිරිමදින කල තිසරයින් නව ජීවයක් ලබන්නාක් මෙන් සෙමෙන් සෙමෙන් හිස ඔසවා මදෙස බලයි. ඇගේ ඉඟ මිටින් ගත හැකිදැයි පරීක්ෂා කිරීමට මා පටන් ගතිමි. එය ඉතා සියුම් පරීක්ෂණයකි. ඇඟිලි තුඩින් ඉතාමත් සෙමෙන් ඇගේ සමේ ස්පර්ශ වන නොවන ලෙසට උකුල පිටුපස සිට ඉඟ දක්වා සෙමෙන් ගෙන යා යුතුය. මම ඇය විඳිමින් සිටිමි..
හිතින්!

ලියා එව්වේ - ප්‍රසන්න සංජය

Friday, November 16, 2012

නාන තටාකයේ බණ්ඩා

බණඩා,  රටේ ප්‍රධාන අමාත්‍යංශයක ඉහළ තනතුරක් දරන පුද්ගලයෙකි. මොනතරම් ඉහළ තනතුරක් දැරුවද ගැමියෙකු වූ මොහු බුලත් කෑමේ පුරුද්ද අත් නොහැරියේය. තමන් ගැමියෙකු වීම ගැන ආඩම්බර වූයේය.

දිනක් බණ්ඩාට ඔහුගේ අමාත්‍යංශයේ කීපදෙනෙකුත් වෙනත් කාර්යාලයක කීපදෙනෙකුත් සමඟ විශේෂ වැඩමුඵුවකට සහභාගී වීම සඳහා ලන්ඩනය බලා පිටත් වීමට සිදු විය.

සියල්ලෝම ලන්ඩනයේ ප්‍රධාන පෙලේ හෝටලයකට සේන්දු වූහ. කතා කර ගත් පරිදි හොටලයේ නාන තටාකයට පැමිණ විනෝද වූහ. බණ්ඩාද තටාකයට බැස්සේය.

ඔහුට එය නාන තටාකයක් බව අමතක විය. ඔහුට එය පෙනුණේ ගමේ වැවක් ලෙසය ඔහු හොඳින් නාන ගමන් හොඳ හැටි තම ශරීරයේ කුනු අතුල්ලන්නට පටන් ගත්තේය. තටාකයේ සිටි එකා දෙන්නා බැගින් ඉන් නික්මෙනු බණ්ඩාට නොපෙනුනි.

ලියා එව්වේ - තරුනිසළයි (http://gsdesilva.blogspot.com/)

Wednesday, November 14, 2012

ළමයි

ආයිබෝවන් ටීච....
ආයුබෝවන් වාඩිවෙන්න.
ටීච මං පිටපත් ලිවීම් දෙකක් ලිව්වා...
ටීච මං අච්චු පොතේ වැඩ කළා...
ටීච මං සංඛ්‍යානාම පිටු දෙකක් ලිව්වා...
ආ හොඳයි මට ගෙදරවැඩ පොත් දීලා දැන් වාඩිවෙන්න...
දැන් ගන්න මිශ්‍ර අභ්‍යාස පොත්...
ටීච ප්ලේන් එකක්...
දුවමු දුවමු ඉක්මනට...
ළමා....යි
1. ළමයා: ටීච ඒක ප්ලේන් එකක් නේද?
2. ළමයා: නෑ ඒක හෙලිකොප්ටරයක්. නේද ටීච...
3. ළමයා: ටීච ඒක අපේ ඉස්කෝලෙ පිට්ටනියට බාන්න පුළුවන්ද?
4. ළමයා: මේකට බාන්නැහැ ඒක බාන්නෙ ලොකු ඉස්කෝලෙ පිට්ටනියට.
3. ළමයා: ටීච ඒක අපේ පිට්ටනියට බාන්න පුළුවන්ද?
ඔව් ළමයිනේ ඒක අපේ පිට්ටනියට බාන්න පුළුවන් එකක්.
ළමෝ හැමෝම: හෑ...? ටීච ඒක බෑවම අපි සෙල්ලම් කරන්නෙ කොහොමද?


ලියා එව්වේ - මගේ ජීවිතය

Monday, November 12, 2012

ඩුප්ලිකේට් අංජනම

ඕං.. ඒස්වාහ..... ඒස්වාහ... අංජනම් දේවතාවියගේ අනුහසින් මට පේනවා
ඕං.. ඒස්වාහ.. වර වර අංජනම් දේවී ඒස්වාහ!
ඔව් දැන් පැහැදිලියි. යතුර තිබෙනවා! හොඳින් පැහැදිලියි ස්ථානය...
ඔව් කොළ පාට තීන්ත ආලේප කළ තට්‍ටු දෙකේ ගෙයක්...
ඉහළම තට්‍ටුවේ කාමරයක අල්මාරියක යතුර තියෙනවා...
ඔව්.. මට තවත් පේනවා.. ඔව් ඒ යතුරමයි..
අල්මාරියේ ලාච්චුවක පුංචි පෙට්ටියකයි... යතුර තියෙන්නේ...
අංජනම් දේවතාවිය අවසරයි...
මම හිතන්නේ ඔය අපේ ගෙදර!
ඔව් ඔව් යුෂ්මතාගේ ගෙදරමයි යතුර තියෙන්නේ! ගෙදරමයි! ගෙදරමයි!
සමාවෙන්න අංජනම් දේවිය මම දන්නවා ඔය කියන යතුර! ඔය ගෙදර අල්මාරියේ ලාච්චුවේ අරන්තියෙල තියෙන ඩුප්ලිකේට් යතුර!
තවත් යතුරක් තිබුණා ඒකයි නැති වෙලා තියෙන්නේ...
මේකත් ඒ යතුරමනේ.. මම හිතන්නේ අංජනම් දේවිට පොඩ්ඩක් පැටලෙන්න ඇති.

ලියා එව්වේ - නිසල (http://nisalanirmana.blogspot.com)

Friday, November 9, 2012

සන්තෝශයේ ත්‍රිකොණමිතිය

ආදරය රාගයද නොවේ
රාගය යනු අදරයම නොවේ
රාගය විශ්වාසයත් නොවේ
නමුත් රාගය විශ්වාසය මත රඳා පවතී
අදරය යනු විශ්වාසයම නොවේ
අදරයේදී රාගය ඇතිවේ
රාගය ඇතිවන්නේ විශ්වාසය මතිනි
නමුත්
විශ්වාසය රාගය නිසාම ඇති නොවේ
සතුට නිසාම ආදරයට පැවැත්මක් නැත
රාගයෙන් තොර ආදරය බොහෝ දුර දෙයකි
නමුත් සතුට ආදරය මතින් ඇතිවේ

සන්තෝශය ඇතිකිරීමට ආදරයට හා රාගයට පමණක්ම නොහැකිය
සන්තෝශය ඇතිකිරීමට රාගයට හා විශ්වාසයටම පමණක්මද නොහැකිය
සන්තෝශය ඇතිකිරීමට ආදරයටම හා විශ්වාසයට පමණක්මත් නොහැකිය

රාගයෙහි පමණක්ම හැසිරීමෙන් ජීවිතය සතුටු නොවේ, නොඑසේනම් එය හුදෙක් සතුටක් නොවේ, ආදරය පමණ්ම ලැබීමත් විටෙක අසත්තෝෂයක් ඇති කරයි, විශ්වාසය පමණක්ම රැගෙන යන්නාට ආදරය සහ රාගයත් හමු වූ විටෙක, සන්තෝශය ඇතිවේ!

ලියා එව්වේ - සුදු හංසි (http://kaveej.blogspot.com/)

Wednesday, November 7, 2012

Girls Vs Bus තියරිය

“ගෑණු ළමයි පාරේ යන බස් වැනිය, එකක් වැරදුනොත් අනිකේ යා හැකිය.” 

බලන්න මේ කියමන අහල තියෙනවද කියල.  මේක තියරියක් නම් අපිට මේ තියරිය ගොඩනගන්න වෙන්නෙ උපකල්පන 2ක් මත. 

1.    ගෑණු ළමයා = බස් එක
2.    දවසක්  = ජීවිත කාලය 
   
කොහොම උනත් ඒක ඇත්තක්ද කියල තීරණය වෙන්නෙ ඔබ බස් එකට ගොඩ වෙන්න හදන තැන මතයි.

කොළඹ පැත්තෙ නම් පාරවල් වල එක බස් එකක් යනකොට තව එකක් විදිහට පෝලිමේ බස් එනව, එක බස් එකක් වැරදුනාට නම් අවුලක් නෑ. ඒත් අපේ ගම් පළාතෙ,

මුළු දවසටම තියෙන්නෙ එකම එක බස් එකක් විතරයි.

අන්න ඒ නිසා මම නම් කීයටවත් බස් එක මිස් කරගන්නෙ නෑ.

ඇත්තමයි...

ලියා එව්වේ - මන්දාරම (http://mandharama.blogspot.com/)

Monday, November 5, 2012

පහනේ භූතයා!

ඕන්න එකෝමත් එක කාලෙක, (ඒ කිව්වේ පහන් ඇතිල්ලුවාම භූතයෝ මතු වෙච්ච කතා සේරම සිදුවෙලා ඉවර වෙච්චි කාලෙක) ජීවත් උනා මනුස්සයෙක්. එයාගේ නම ජෝසප්. ජෝසප්ගේ විනෝදාංශය උනේ පහන් එකතු කරන එක. දවසක් එයා හොයං ආපු පරණ පහනක් රෙදි කෑල්ලකින් පිහිදාන්න ගත්තා විතරයි ඒකෙන් මතු උනා භූතයෙක්.

ඔබ මාව මේ පහනෙන් එළියට ගත්තට ඔබට කැමති ඕනෑම වරයක් ලැබෙනවා!

ඕනෑම වරයක්? 

ඔව් ඕනෑම වරයක්!

එහෙනං මම මගේ වරය විදිහට ඉල්ලනවා මට තවත් වර ඕනෑම ගාණක් ඉල්ලන්න පුළුවං වෙන්න කියලා.

ඔන්න ඔය වෙලේ තමයි භූතයාට තරු පෙනුනේ. භූතයා වරයත් නොදීම අතුරුදහන් උනා. එදා ඉඳං අද වෙනකං ආයේ කිසිම දවසක කිසිම පහනකින් භූතයෝ මතු උන්නෑ.

ලියා එව්වේ - ෴පූසා෴ ( http://sudupoosa.blogspot.com/)

Friday, November 2, 2012

බාරය

ඈ නව විලාසිතා වලට බොහෝ සේ ඇලුම් කල තරුණියකි. දිනක් හිතවතෙකුගේ උපන්දින සාදයකට ඇරයුම් ලැබූ ඈ වේලකල් ඇතිවම ඒ සඳහා සූදානම් වූයේ ඉතා උවමනාවකිනි.. නියමිත දිනය උදාවූ කල ඈ වෙනස්ම මාදිලියේ කලු පැහැති ඇඳුමකින් සැරසී අත් සහ පයටද කලු පැහැති නිය ආලේපන ගැල්වුවාය.. වැඩි අලංකාරය පිණිස පයෙහි කලු පැහැති පටියක්ද ගැට ගැසුවාය.. පා නොවැසෙන සේ පාවහන් පැලඳූ ඈ හුන් සෙනඟ මැදින් ගමන් කර කකුලක් පිට කකුලක් දමා උජාරුවෙන් හිඳගන්නී.

"නංගී" අවටින් ඇසුන සුපුරුදු කටහඬකට ඈ සවන් යොමුවාය..

"නියපොතු කුණු වෙලා හින්දද කකුලට බාරයක් ගැටගහන් ඉන්නේ?? "

තරමක කලබලයකට පත්වූ ඈ වටපිට බැලුවාය..

වටින් පිටින් තදකර නොහැකිව පිපිරූ සිනා හඬවල් ඇසෙන්නට විය..


ලියා එව්වේ - ඉෂ්වි තෙහාරා

Related Posts Plugin for WordPress, Blogger...