සත්ව කරුණාව

ළමයෝ, ඉක්මනට මෙහාට වරෙන්...
මේ අහිංසක බලු පැටියට කවුද ගහලා...
ඌ කකුලක් කොරගහනවා....

රත්නේ අයියේ ආරංචිද වැඩක්....

ඊයේ රෑ සුමපාලයව ඉස්පිරිතාලේ ගෙනිහින්. අර අලුතෙන් ආපු උන්ගේ ගෙවල් ගාව වැටිලා ඉඳලා. ඒ ගෙදර උන් එක්ක එච්චර හිත හොඳින් නෙමෙයි ඉඳලා තියෙන්නේ. මිනිස්සු කියන්නේ බීලා වැටිලා කියලා, ඒත් මන් හිතන්නේ අරුන් ගහලා.

උන්ගේ &^*(^*&....

කොල්ලෝ ගෙනෙන් අර ඇඳ යට තියෙන කිතුල් පොල්ල මන් ගිහින් ඕකුන්ට පාඩමක් උගන්නලා එන්න. සුමනේට අත තියන්න උන් කවුද???

පිටින් ආවනම් ඒ විදිහට ඉන්න ඕනේ කාලකන්නි හැත්ත.

මන් ඉක්මනට ගිහින් අරූගේ අණ්ඩක් කඩලා එන්නම්....

ළමයෝ අර මේසේ උඩ සල්ලි ඇති, කඩෙන් බිත්තරයක් ගෙනත් හදලා දීපන් ඔය අසරණ සතාට.

ලියා එව්වේ - නිෂාන්

ලොව පැරණිම ගම් වර්ගය

ලෝකයේ පැරණිම ගම් වර්ගය පාවිච්චි කලේ මිනිස්සුන්ව එකිනෙකාට අලවල තියන්න....

සාමූහිකව ඉදිරියට යන්න පුළුවන් මිනිස් සමූහයක් බිහිවෙන්නෙ එහෙම හැමෝම එකට ඇලුණම කියල තමයි ඒ ගම් වල නිෂ්පාදකයො කල්පනා කලේ...

ලෝකයේ බොහෝ තැන් වල නිෂ්පාදකවරු මේ ගම් වර්ගය එක එක නම් වලින් නිෂ්පාදනය කලත් ඒව අතරින් ජනප්‍රිය වුණේ බොහොම ටිකයි...

හැබැයි වර්තමානයේ තත්ත්වය වෙනස්... ගම් වල රසායනය හොයාගත්තු නිෂ්පාදකයන්ගෙ අරමුණු මොනව වුණත් ගම් වර්ග මාකට් කරපු උදවිය ගම් වල රසායනික වෙනස්කම් කරල තියෙන නිසා දැන් තියෙන මේ වර්ගයේ ගම් මිනිස්සුන්ව අලවන්නෙ නෑ...

ඒව මිනිස්සුන්ව වෙන් කරනව...

දැන් මේ ගම්වල නාමයෙන් මිනිස්සු එකිනෙකාට ද්වේෂ කරනව...

ඒත් ගම් වර්ගනම් තාම හොඳට මාකට් වෙනව...


ලියා එව්වේ - hare :-) (http://living.hartstuff.com/)

වෙඩි තැබීම

මහසෙනගක් රැස්වෙලා. නඩුවක්.. කාගෙද? පහුගිය දිනක නගරේ මරලා දාලා තිබුණු නගරාධිපතිතුමාගේ මිනීමරුවා අහුවෙලා. අලුත් නගරාධිපති නඩුව අහනවා. මහා සෙනගක් බලන් ඉන්නවා.

නගරාධිපති - උඹලම නේද හිටපු නගරාධිපති තුමාව පත්කරේ. මට මතකයි තෝ අන්තිම දවසේ එතුමා කරතියාගෙනත් ගියා අපේ එකා දින්නා කිය කිය.. බොරුද මම කියන්නේ.


මිනීමරුවා: ඇත්ත.. මම ඌ කරතියාගෙන ගියේ අපි වගේ මිනිස්සුන් වෙනුවෙන්...


නගරාධිපති: එතකොට එහෙම පත්කරපු එතුමා මරලා දැම්මේ මොකටද?


මිනීමරුවා: ...ඒත් මිනිස්සු වෙනුවෙන්


නගරාධිපති: එහෙමද?.. ආරක්ෂකයනි මුට ප්‍රසිද්ධියේ වෙඩි තියන්න අණ කරනවා


මිනීමරුවා - හ්ම්ම්.. අපි මැරුණේ ටික කාලෙකට කලින්.. දැන් වෙඩි තියපල්ලා.. ඒත් හිටපු නගරාධිපතියා අපිට වෙඩි තිව්වේ කලින්.. දැන් මැරෙන්න දෙයක් ඉතුරුවෙලා නෑ අපිට


ලියා එව්වේ - Janaranga Dewasurendra (http://www.hearttoheartsrilanka.blogspot.com/)

මායි - හිතයි

"දුක දැනුන හිත සනසන්නට කවුරුත් නැත්නම්

පුන්චි කදුලු බිදුවක දුක දිය කරලා අරින එකේ වරද නෑනෙ"

ඒත් එහෙම කරන්නේ කෝමද?

එහෙම කරන්න බැරිනම් කරන්න තියෙන්නේ ඉතින්,

අතපය රිදෙනකන් මොනාහරි කරගන්න තමයි

දැන් එහෙම කලොත් හරියයිද?

ඒක ඉතින් මම දන්නේ නෑ...

එහෙම කරන්නත් බැරිනම් ඇස් දෙක වහගෙන,

සද්දේ වැඩී කරලා සින්දුවක් අහන්න..

ඒත් එතකොට අනිත් මිනිස්සුන්ට කරදරයිනෙ..

ඒකට උඹ මොනා කරන්නද?

හිත රිද්දුවෙත් අනිත් මිනිස්සුමනම්

උඹ මොකටද උන් ගැන හිතන්නේ

ඒකත් ඇත්ත තමයි නේ..?

එහෙනම් ඉතින් මම කියපු විදිහට කරපන්

උඹ කැමති දෙයක්

මට බෑ බං ඒ හිත රිද්දන්න

එහෙනම් ඕන මගුලක් කර ගනු

මම යනවා

-මායි හිතයි අතර උන සාකච්චාවක්-

ලියා එව්වේ - MaRLaN (http://wenasak.blogspot.com/)

තිරිසන් ෆැක්ටරිය...

මිනිස්සුන්ව තිරිසන්නු කරන ෆැක්ටෙරි ගොඩාක් බිහිවෙලා. එක එක ජාතියෙ තිරිසන්නු එලියට එනවා එවගෙන්. දවසක මම ලොකයේ හොදම පවුකාරයෙක් වෙනවා එක සිකුරුයි. පලිගන්න චේතනාවෙන් මාව දැවෙනවා හැම මොහොතකදිම. වෙඩි තියලා, කපලා කොටලා බැහැ. හිනාවෙන් දයාවෙන් කරුනාවෙනුත් බැහැ. මොකාක් හරි අලුත් දෙයක් හොයාගන්න වෙනවා මෙ තිරිසන්නුත් එක්ක ඉන්න. නැත්තම් මටත් තිරිසනෙක් වෙන්න වෙනවා. කො අර මම මාගෙ දෙ වෙනුවෙන් මහන්සි උන මිනිස්සු. කාටද මුන් කඹුරන්නෙ. මොකද්ද අපිට නැතිවුනෙ. කොහොමද එක ආපහු ගන්නෙ.... එවා මෙවා මුකුත් නැහැ.. තිරිසන් ෆැක්ටෙරිය පටන්ගත්තු දා ඉදන් වැඩ.. එක එක ජාතියෙ උන් එලියට එනවා. අමතක කරන්න බැරි වෙන දෙවල් සිද්ද වෙනවා. අමිලවත් ගඟට දාලා දැන් අවුරුද්දකට වැඩියිලු නෙද.....

ලියා එව්වේ - රවා (http://ravamrt.blogspot.com/)

ලබන අවුරුද්දේ එන්න

“අද සරුයි අම්මේ. රු.6000ට රු.120යි අඩු. හෙට නිදහස් දවස නිසා බස්වල යන මිනිස්සු පිං දිදි ගත්තේ ජාතික කොඩි ටික, ළමයින්ට ඉස්කෝලේ ගෙනියන්ට එහෙම එපැයි”‍

අම්මා ගෙවල්කුළි ගෙවන්ට. මෙන්න උදේ අම්මාගේ අතින් ගත්ත රු.200ත්” සියලු මුදල් අම්මා අත තැබීමි. නිදහස් දිනයත් සතිඅන්තයත් එකටම ආ නිසා ඒ දින තුනේ වැඩි ඉපයීමක් නොවුනි.

“මේන් පුතේ රු.200/-ක් 20 කොළ වලින්ම. උඹ කියන්නැහේ අතේ සල්ලි තියෙනවා දැක්හම මිනිස්සු උඹ අතේ තියෙන බඩුවක් ගන්න උනන්දුවෙනවා” අම්මා දුන් මුදල් සමඟ සඳුදා පාන්දරින් පිටත්වීමි.

“මල්ලි මොකද අද 7 වෙනිදා ජාතික කොඩි උස්සගෙන ආවේ. යන්න යන්න ලබන අවුරුද්දේ එන්න” අම්මා අතට දුන් මුදලින් දවල්ට කා හිස් අතින්ම නිවසට ගොඩවීමි.


ලියා එව්වේ - රන්දිල් (http://ranrandil.blogspot.com/)

ගම වටේ...!

කඨින චීවරය ගම වටේම ගියා. ගමෙන් තුන්කාලක සාදුකාරෙ ඒ පස්සෙන් වැටුණා...

එන්න බැරි උදවිය පාන්දර 4ට නැගිටගෙන ගෙවල් ඉස්සරහ ඉඳන් චීවරයට අතගැහුවා...

හයට විතර පන්සලට ඇදුණ කඨින පෙරහැරේ හිටපු සෙනග දැක්කම ලොකු හාමුදුරුවන්ගෙ කට කොණට හිනාවක් ආවා...

කඨින ධර්ම දේශනාව අතරෙ පෙරහැරේ ගිණි බෝල කරකවපු නවිඳු මල්ලිට මදුරුවො දශ්ඨ කලා...

එයාට ඩෙංගු හැදුණා...

එතනින් පටන් අරන් ඩෙංගු බෝ වෙන්න ගත්තා... ගම වටේම...

පී.එච්.අයි. මහත්තුරු දෙවතාවක්ම මදුරුවො බෝවෙන තැන් විනාස කරන්න කියල එනවුන්ස් කලා...

ගමේම පත්‍රිකා බෙදුවා... පෝස්ටර් ගැහුවා...

එයාලටම ඇවිත් ගම වටේම බලන්නත් වුණා.

සෑහෙන කාලයක් ගියා. කීප දෙනෙක් මැරුණා...

මිනිස්සු අල්ලපු ගෙවල්වලට බැණ බැණ හවස 4 වෙද්දි ජනෙල් වැහුවා...

ලියා එව්වේ - h (http://living.hartstuff.com/)

නුඹ නටාපං අපේ හෙට දවස වෙනුවෙන්........

ගොදුරක් හොයා
ඇදීගෙන
හතුරෙක්ට
ඔය පෙන ගෙබේ
පුප්පගෙන
තුඹහකට වෙලා
දරන ගහන්
නිදියගෙන
නිදහසේ උන්නු
උඹේ දිවිය
බට පෙට්ටියක
හිර කරන්
එහාට මෙහාට
කුදලන් ගිහින්
උඹව
නටව නටව
උඹට දෙන
දස වදේට
මට
සමාවෙයන්
නයි හාමි,

එක අතකින්
මම වැරදිත් නෑ
මේක අපෙ
පරම්පරාවෙන්ම
එන උරුමෙ
අපේ අප්පොච්චිලත්
උඔලගෙ වරිගෙ
උන්ව හිරකරන්
නටවපු එකේ
මටයි කියල
ඒකෙ වෙනසක් නෑ
අපි උඹලට
දෙයියන්ට වගේ
සළකනව

සත්ව හින්සනේ
සමාජ සම්මතේ
ඔය බම්බු වලින්
අපේ බඩවල්
රැකෙන් නෑ බං
බඩ රැකුනොත්
තමයි
අපි රැකෙන්නෙ
උඹ නැටුවොත්
තමයි
අපේ බඩවල්
සැනහෙන්නෙ
අපිට නින්ද
යන්නෙ

මං නලාව
පිඹින්නං
ඉතිං උඹ
නටාපං
අපේ හෙට දවස
වෙනුවෙන්...........

ලියා එව්වේ - සොඳුරු මිනිසා (http://sonduruminisa.blogspot.com/)

"අනේ ඇයි අම්මේ"

අනේ ඇයි අම්මේ

මනුසත්තු අලි ඇත්තුන්ට

මෙතරම් වෛර

කරන්නේ

අපේ කැළෑ එලිකරල

ඒ ඇත්තො

හේනක් පැලක්

අටවගෙන

වගා කරනව

තමයි........

ඒකකට පැනල

අලයක් බතලයක්

උගුල්ලන් කෑවෙ

ඒ අයගෙන්

පලිගන්නවත්

වගා පාලු කරන්නවත්

නෙමෙයි..........

ඉන්න බැරි

බඩගින්නටයි.........

මේ නියන් සායෙ

අපටයි කියා

ඒ හැටි කෑමක්

කොයිබින්

කියලද?........

අපේ අප්පච්චිල

ලොකු මාමල

වගේ

ඒ ඇත්තන්ට

දරුණු වෙන්න

මට හිතක්

නෑ අම්මෙ.........

ඒ අත්තොත්

පන කෙන්ද

ගැට ගහගන්නෙ

අමාරුවෙන් කියල

මම දන්නව........

බුදුන් සරණ ගිය

නාලගිරි වගේ

අපිත්

කවදා හරි

මේ සන්සාරෙන්

එගොඩ වෙන්න

ඕන.........

ඒත්,

මනුසත්තු

උන්ට ළමයි

නැති ගානට

හිතක් පපුවක්

නැතිවද,

මගේ සිඟිති

දළ දෙකට

මෙතරම්

කෑදර

අනේ ඇයි අම්මේ....

ලියා එව්වේ - සොඳුරු මිනිසා (http://sonduruminisa.blogspot.com/)

ඒ අපේම ජීවිතේ නිසයි

එළියට බහින්න

අහස පොඩ්ඩක් බලන්න

මතක් කරන්න

අන්තිමටම අහස

ඕන කමින්

බැලුවෙ කවද්ද

කියලා

අපි අපිත්

නොදැනම යන්ත්‍ර

වෙලා නෙ

ඉර නගිනවා

ඉර බහිනවා

මල් පිපෙනවා

සමනල්ලු පියාඹනව

මේව බලන්න

කෝ අපිට

වෙලාවක්

අයියෝ ඕව බැලුව

කියල

අපිට ඇත් ඵලේ

මොකක්ද?

පොඩ්ඩක් හිතන්න

මේ අපේ හිතමද

කියල

හ්ම්.......

ඇත්ත නේද

ඒත් ඒක

හිතන්නත්

වෙලාවක්

කොහෙද?

අපි අපිත්

නොදැනම

ලොකු මිනිස්සු

වෙලා නෙ

අපිට අහිමි වුණු

අපේම කියල

කාලයක්

තිබුනද වත්

මතක නෑනෙ

ඒ කාලෙ

කොච්චර ලස්සනද

කොච්චර සුන්දරද

ආයෙත් ඒ කාලෙට

යන්න පුලුවන්නම්

කොච්චර නිදහසක්

තිබුනද

හිතේ මො‍ලෝ බරක් නෑ

හිතෙනකොට නිකම්ම

සුසුමක් මුවින්

පිටාවෙනව නේද

ඒ අපේම

ජීවිතේ නිසයි

ලියා එව්වේ - ෴සොඳුරු මිනිසා෴ (http://sonduruminisa.blogspot.com/)