ඉර

රතුම රතුපාටට අහසේ තිලක තියලා හිරු සාගරේ අග්ගිස්සට වෙලා අන්තිම වතාවට ලෝකෙ දිහා බලන වෙලාවේ මම ඔයාගේ උරිස්සට හේත්තුවෙලා..

මුහුදු හුළඟ මගේ කොණ්ඩේ හොඳටම අවුල් කරලා..

දැන් නම් නියම පිස්සි... මගේ ඔළුව අත ගගා ඔයා ආදරෙන් මුමුණනවා මට ඇහුණා....

මම කිසිම සද්දයක් නැතුව ඔයා ගේ උණුහුම විඳින්න ඇස් පියාගෙන..

ඔයා නිදිද? මට පාළුයි නැගිටින්නකෝ ඉතිං.....

මම නෑහුන ගානට ඇස් දෙක තවත් තද කරලා පියා ගත්තා..

ඔයා හෙමින් ඔළුව පාත් කරලා එකපාරටම මගේ නළලට උම්මා එකක් දුන්නා..

අනේ තව එකක්

මං ඇස් පියා ගෙනම කිව්වා

කට්ට කෙල්ල

ඉරත් හිනා වෙවි මුහුදු පතුලට යන ගමන ඉක්මන් කරන හැටි නෙත් කොනට මට පෙනුනා....


ලියා එව්වේ - උපේක්ෂා (http://gurupara.wordpress.com/)

මංගල ඇරයුම් පත

මුහුදු වෙරළ අයිනේ.. ඔයයි මායි.. වැටකෙයිය මුලක් උඩ වාඩි වෙලා

මගේ අතේ තිබුනේ ඇරයුම් පතක්.. ඔව් ඒ ඔයාගෙ මංගල උත්සවයට.

ඔයා මේක දෙන්නද මට එන්න කිව්වෙ ?

අපි ආයෙ මෙහෙම කවදාවත් හම්බෙන්නෙන් නැහනේ. ඒකයි අයේශ්.

ඇයි මේක එතකොට ?

ඇයි ඔයා එන්නෙ නැද්ද මගේ වෙඩින් එකට ?

මම කොහොමද එන්නේ ?

ඇයි ඔයා ආස නැද්ද මම මනමාලියක් වෙලා ඉන්නව බලන්න ?

ඒ මුහුනේ තිබුනේ ප්‍රශ්නාර්ථයක්ද ? පසු තැවීමක්ද ?

ආසයි. ඒත් වෙන කෙනෙක්ගෙ නෙමෙයි. මගේ.

ඔයාට මාව දැන් අයිති වෙන්නෙ නැහ අයේශ්.. ඔයා පරක්කු උනා වැඩියි. ඒත් ඔයා එන්න මගේ වෙඩින් එකට.

පසුව ලියමි : තව මාස කීපයකින් වෙන සිදුවීමක්.


ලියා එව්වේ - පිස්සා පළාමල්ල (http://palaamalla.blogspot.com/)

රවුම සහ කොටුව

මම වැල්ලෙ රවුමක් ඇන්ද. එයා වැල්ලෙ කොටුවක් ඇන්ද.

"ඇයි ඔයා කොටුවක් ඇන්දෙ?" මම ඇහුව.

"ඇයි ඔයා කොටුවක් ඇන්දෙ නැත්තෙ?" එයා මගෙන් ඇහුව.

"රවුමකට කෙළවරක් නෑ හරියට ආදරේ වගේ." මම එහෙම කිව්ව.

"දැන් කියන්න ඇයි ඔයා කොටුවක් ඇන්දෙ?" මම ආයෙත් ඇහුව.

"විසේස හේතුවක් නෑ. ඔයා රවුමක් ඇන්ද, ඉතින් මම කොටුවක් ඇන්ද. ඔයා මට කිව්ව නම් ආදරේ සංකේතවත් කරන දෙයක් අඳින්න කියල මම වෙන මොකක් හරි අඳිනව."

"මම එහෙම කිව්ව නම් ඔයා මොකද්ද අඳින්නෙ?"

"දන්නෙ නෑ. ඒත් මම කවදාවත් රවුමක් අඳින්නෙ නෑ."

"ඒ ඇයි?"

"රවුම එක තැන කැරකෙනව, හරියට අපේ ආදරේ වගේ"

එකපාරටම ආපු රැල්ලකින් අපි රටා ඇන්ද මුහුදු වැල්ල අලුත් වුනා.

ලියා එව්වේ - නොදරුවා (http://nikamatawage.blogspot.com/)